अब फेर आहीं

अब फेर आहीं हमर दुवारी वो मन ।।

करही एक दूसर के चारी वो मन।।

काबर कि आवत हे अब फेर चुनाव।

बन जाहीं हमन के संगवारी वो मन।।

देखाहीं हमला फ़ेर सुराज के सपना

मारहीं आनीबानी के लबारी वो मन ।।

अभी तो माढ़ ही इखर गोड़ भुइयां मा

फेर आगास मा उड़ाही वो मन।।

हम मन ला भुला जाही पांच बछर फेर

कुर्सी के करही रखवारी वो मन ।।

सड़क

ये डबरा ला तुमन सड़क कहिथौ।।
इहाँ गिरे मा झन भड़क कहिथौ।।

जे बात कहे म लाज आना चाही
 वो बात ला तुमन बेधडक कहिथौ।

वोट मागे बर मोर दूवारी आ के
मुहीच ला थोर कुन सरक कहिथौ।।

मै बात कही देव कबर कि सिरतोन
मोला दू चटकन झड़क कहिथौ।