छत्तीसगढ़ी गजल : ये जिनगी तोर करजा ला, बहुत रो रो चुकाए हन।

1222 1222 1222 1222

ये जिनगी तोर करजा ला, बहुत रो रो चुकाए हन।
कहाँ जाना रिहिस हमला,कहाँ आ के थिराये हन।

भियाँ मा गोड नइ माढ़य,मया के सोर जब मिलथे,
हपट जाथन कभू गिरथन,कभू उठ के लजाये हन।

मया जेला घलो मिलथे, मया के मोल नइ जानय,
समझ के बात हे लेकिन समझ ये कोन पाए हन।

मुहब्बत चार दिन के अउ उमर भर के जुदाई हे,
तभो ले रास्ता जोहत सरी जिनगी सिराये हन।

खबर अखबार ला पढ़ के, ये दुनियाँ लागथे जंगल,
कभू कोई शेर नइ जानय,कि कइसे राज पाए हन।

सियासत का जतन करथे,कि मनखे भेड़ हो जाथे,
सबो जानत बुझत हन अउ,तभो आ के झपाये हन।

मजा ये बात मा आथे, हमर जे खात पीयत हे,
यकीं हमला दिला देथे,कि हम चारा चराये हन।

गजल : हमला तो मयखाना चाही।

नित नवां बहाना चाही।

हमला तो मयखाना चाही।

 

अब चुनाव मा सब दल मिलके

पव्वा रोज पियाना चाही ।

 

तुमन कमाहूं पाँच साल जी,

हमला फ़ोकट खाना चाही।

 

वादा के हे काय भरोसा,

सोच समझ गुठियाना चाही।

 

रतिहा मँय सपना देखे हँव,

हरहा ला हर्जाना चाही।

 

आंख रहत जे बन गे अन्धरा,

वो मनखे मर जाना चाही।

 

डिस्पोजल हर मुड़ मा चढ़गे,

अब 'प्रसाद' घर जाना चाही।