मोर छत्तीसगढ़ी गीत/कविता : #cggazal #chhattisgrhi #chhattisgrh

#cggazal #chhattisgrhi #chhattisgrh लेबलों वाले संदेश दिखाए जा रहे हैं. सभी संदेश दिखाएं

कुण्डलिया : होरी

होरी हर मन मा जलय, मिटय कुमत कुविचार।
मथुरा मया गुलाल ले, नाचय बीच बजार।
नाचय बीच बाजार, फाग गा गा संगी।
मदहा समझय लोग, समझ ले कोई भंगी।
पिचकारी भर रंग, छन्द बरसाहँव गोरी।
साधक सब सकलाय, मात गे हमरो होरी।

लावणी छन्द : खिच के लवड़ी मार कका।

हद ले जादा बाढ़त हावय, निस दिन अत्याचार कका।
मुड़ी नवाँ के करन मजूरी, तब ले खाथन मार कका।
ललकारे के बेरा आगे, छोड़ अभी जोहार कका।
जे बैरी हा उतलँग करथे, खिच के लवड़ी मार कका।

छतरी कुल के कुलदीपक हम, बड़े बड़े निपटाए हन।
अब का होगेे काकर डर मा, बइठे मुहूं लुकाए हन।
जबले छुटगे हमर हाथ ले, मुरचा खावत धार काका।
पजा डार अब बेरा आगे, कहाँ करे तलवार कका।

लक्ष्मीबाई नाम सुने हन, झाँसी वाली रानी के।
हक के खातिर लड़ के मरगे, पूत उही बलिदानी के।
बरछी भाला गिरवी धर के, बन गे हन बनिहार कका।
फेर मान ला नइ बेचे हन, बिक गे खेती खार कका।

वीर शिवाजी के गाथा ला, अब ले नहीं भुलाए हन।
हमी समर मा रार मचा के, लहू धार बोहाये हन।
हमर लहू का पानी होगे, जाँगर खाय दियार कका।
करै कोलिहा मन हर कइसे, बघवा ऊपर वार कका।

परबुधिया बन कब तक रहिबो , गँवा अपन चिन्हार कका।
गाँव गली घर पर के कब्जा, हमन सिरिफ रखवार कका।
हमर बाट ला छेकत हावय, बगरन्डा भरमार कका ।
काँटा खूंटी काट काट के , बाट अपन चत्वार कका।

भूख

भूख अउ बड़हत हे, वो मन खात जात हे।

सब उंकर भोभस म , भरात जात हे ।

तभो ले भूख साले उंकर नई मिटाय,

लूट लूट के सब ल पचात जात हे।

जमीन जंगल, रुख राई, कहीं नई बचीस

समसान तको ल पोगरात जात हे।

रेती गिट्टी, सिरमेंट छड़ अउ धुर्रा माटी,

सौहत सड़क ल निपटात जात हे।

वाह रे बेईमान , बाढ़त तुंहर खनदान,

कउवा कुकुर सही जम्मो ल बलात् जात हे।

का करय जनता, उन्डे पी के मन्द महुवा

बेसरम कस वो मन ह भोगात जात हे।

देख देख के मन कल्पथे, त बोले बर परथे,

'परसाद' अब मति मोरो छरियात जात हे।

मथुरा प्रसाद वर्मा एक क्रियाशील शिक्षक है साथ ही एक कवि और साहित्यकार है . छत्तीसगढ़ी भाषा साहित्य के

कुण्डलिया : होरी

लावणी छन्द : खिच के लवड़ी मार कका।

भूख

विशिष्ट पोस्ट

रूपमाला छन्द

यह ब्लॉग खोजेंमोर छत्तीसगढ़ी गीत कविता

संपर्क फ़ॉर्म