सब भासा ले मीठ मयारू, छत्तीसगढ़ी भासा हे।
सुवा करमा अउ ददरिया, पण्डवानी अउ जसगीत हे।
किस्सा कहानी आनी-बानी ,कतका मया पिरित हे ।
मुँह म ये रस घोरत रहिथे, जइसे मीठ बतासा हे।
सब भासा ले मीठ मयारू, छत्तीसगढ़ी भासा हे।
हमर ये महतारी भासा , हमर गरब गुमान ये।
जे अप्पड़ के भासा कहिथे, वो सिरतोन वो नदान ये।
हम तो सीना ठोक के कहिथन, इही परान के आसा हे।
सब भासा ले मीठ मयारू, छत्तीसगढ़ी भासा हे।
सारी दुनियाँ अपने भासा, मा करथे सब काम जी।
लिखथे -पढ़ते अपने भासा, करथे जग मा नाम जी।
हमर राज बर छत्तीसगढ़ी, इही हमर अभिलासा हे।
सब भासा ले मीठ मयारु, छत्तीसगढ़ी भासा हे।
बड़े-बड़े गुनी गियानी मन, साहित्य ला सिरजाये हे।
दुनियां भर म एकर मया के, झंडा ल फहराये हे।
अपने घर म तभो ले काबर, रही जाथे ये पियासा य
सब भासा ले मीठ मयारु, छत्तीसगढ़ी भासा हे।
स्कूल कालेज, कोट- कचहरी, छत्तीसगढ़ी बोलव जी।
विधानसभा के दुवारी ल, महतारी बर खोलव जी।
बैरी मन ह खेल करत हे, जस सकुनी के पासा हे।
सब भासा ले मीठ मयारु, छत्तीसगढ़ी भासा हे।
हमर राज ला हमी चलाबो, रद्दा नांवा गड़बो जी।
हमरो विकास होही जब हम, अपने भासा पढ़बो जी।
परबुधिया मन काय समझही, का तोला का मासा हे।
सब भासा ले मीठ मयारु, छत्तीसगढ़ी भासा हे।
लड़े ब परही त लड़ जाबो , छत्तीसगढ़ महतारी बर।
मरे बर परही त मर जाबो, अपने घर अउ दुवारी बर।
हमरे राज मा हमी भिखारी, बस अतके हतासा हे।
सब भासा ले मीठ मयारु ,छत्तीसगढ़ी भासा हे।
कोई टिप्पणी नहीं:
एक टिप्पणी भेजें