हे कुर्सी देव तोर महिमा हे भारी !

हे कुर्सी देव तोर महिमा हे भारी ।
देश के जम्मो नेता हे तोरे पुजारी ।
हमन ला रहिथे  तोरेच आसरा ;
चाहे बईठन हम, चाहे हमर सुवारी ।

तोरे दरस बर, बन जाथन भिखारी ।

तोरे खातिर जनता के सुनथन गा गारी ।

तोला गवा के कुकुर कस किंजरथन;

हवा मा उड़ाथन  जब बनथस संगवारी ।

घेरी-बेरी तोर खातिर मारत हन लबारी ।
तोर बिना नि होवे ककरो चिन्हारी !
तोर किरपा होवे मा, झडकथन रसगुल्ला।
तोर बिना पर जाते कहते बर थारी ।

तोर ऊपर बैठ के ,तोर करथन सवारी ।

पाँच बच्छर फेर नि पवन अब हमन बारी ।

आज जेन मन हमर आगू पछु गिजरथे;

हांव-हांव करही वो कुकुर मन सरकारी ।