छत्तीसगढ़ी साहित्य के कोठी म मोर नानकुन प्रयास
तँय पढ़ा, तँय पढ़ा, तँय पढ़ा गुरूजी ।अब कोनो रहय झन अड़हा गुरूजी।तँय पढ़ा, तँय पढ़ा, तँय पढ़ा गुरूजी ।एक-एक कक्षा, सौ-सौ लइका,फेर हर लइका ल ज्ञान दे।का व्यवस्था हे का बेवस्था ,एला तँय झन धियान दे।तोरे भरोसा हे कइसनो कर फेर,तहीं ह जोखा मढ़ा गुरूजी।तँय पढ़ा, तँय पढ़ा, तँय पढ़ा गुरूजी ।जेन लइका स्कूल नइ आवय,ओला स्कूल म लाने ला परही।नीति हे शासन के चाहे बिन चाहे,तोला सबो ला माने ला परही ।सीखय भले झन, फेर साक्षर कहाही ,नाँव ला रजिस्टर म चढ़ा गुरूजी।तँय पढ़ा,तँय पढ़ा, तँय पढ़ा गुरूजी ।फोकट म सबला,सब कुछ चाही,नवाँ जमाना के इही लोकतंत्र ये ।चलनी म चाल फेर रजगा झन निकाल,सस्ता लोकप्रियता के इही मूलमंत्र ये।खिंच-तान अउ ढकेल-पेल फेर,सबो ल आगु बढ़ा गुरूजी।तँय पढ़ा, तँय पढ़ा, तँय पढ़ा गुरूजी ।न बने बिजहा,न उपजाऊ भुइयां,न बने खातू ,न हवा पानी ।परही तुतारी, तुही ल रे बइला,तोरे भरोसा होही किसानी ।भले भूख मरबे नइ पाबे चारा,फेर फसल रहय झन कड़हा गुरूजी ।तँय पढ़ा,तँय पढ़ा तँय पढ़ा गुरूजी ।मथुरा प्रसाद वर्मा "प्रसाद'ग्राम-कोलिहा ,लवन बलौदाबाजार ( छ० ग०)
नइ लाज लगे पग तोर परे, हम छोड़ दिये जग मा सबला जी।अब जे करना सब राम करे, अउ का करना अब हे हमला जी।सब हा पगला कहिथे हमला, हम बोलन ये जग हा पगला जी।चतुरा बन के नइ राम मिले, बन के रहिबो हम तो भकला जी।
122 122 122 12
*शक्ति छन्द*
बनाये बने राम संसार ला।
नहीं पाय कोनो कभू पार ला।
भवर मा फसाये किनारा बने।
तहीं आदमी के सहारा बने।
तहीं भूख दे पेट खाए सके।
दिए हाथ रोटी कमाए सके।
जिहाँ चाह दे राह दे हस तहीं।
विधाता कहूँ तोर जइसे नहीं।
बिगाड़े बनाये मिटाए तहीं।
कि जीना सबे ला सिखाए तहीं।
अभी घाम हे छाँव हो के रही।
इही जिंदगी के कहानी सही।
हवे प्यास पानी घला हे इँहा।
बिपत हे तभे हौसला हे इँहा।
कहीं दुख कहीं सुख रचाए तहीं।
भरे भाव दुनियाँ बनाए तहीं।
ए अभिमानी गरब करे का, ये माटी तन के।
माटी मा मिलही ये चोला, सब माटी बन के।1।
काल लिखे हे अपन कलम मा, मरना सब झन के।
माटी गोटी जोर जोर के, बनगे महल बने।
छोड़ छाड़ के जाना परही, रोवत मने मने।3
पल भर के हेे ये जग मेला, छिन भर तोर मया।
सब चल देही छोड़ एक दिन, लागे नही दया।4।
कोनो सँग मा नइ जावय जी, अब मत समय गवाँ।
मिलखी मारत भूल जही सब, मिलही मीत नवाँ ।5।
सिधवा हरन, बइला हरन, तँय चाब ले पुचकार ले।
रिस बात के मानन नहीं, जी भर तहूँ दुत्कार ले।
हम घर अपन मजदूर हन, मालिक हमर आने हरे।
छत्तीसगढ़ के भाग ला , परदेशिया गिरवी धरे।
💐💐💐💐💐
मत हार के तँय बइठ जा, ये हार रद्दा जीत के।
काँटा घलो हा गोड़ के , रचथे कहानी बीत के।।
चाहे ठिकाना दूर हे, अब बिन रुके चलते चलो।
होथे उही मन हर सफल, जे उठ जथे गिर के घलो।।
हिम्मत करव डटके बने, कल के फिकर ला छोड़ दौ।
करके भरोसा आपके, कनिहा बिपत के तोड़ दौ।
कैसे मुसीबत हारथे ,तँय देख ले ललकार के।
अब कर उदिम बस जीत बर, मत हार मानव हार के।
☺☺☺☺☺☺
हे सरसती दाई माहूँ , बिनती करव कर जोर के।
तोरे सरन मा आय हँव, मद मोह बँधना छोर के।
अज्ञान के बादर छटय, अउ पाँख ला आगास दे।
मँय हँव परे अँधियार मा, तँय ज्ञान के परकास दे।
माँ सारदा है आसरा , देवी हरस वो ज्ञान के।
सत्मार्ग मा मँय चल सकव, रद्दा छुटय अज्ञान के।
लइका हरव मँय कमअकल, नइ आय मोला साधना।
माथा नवाँ के मँय करव, तोरे चरन आराधना।
